Renisse

Renisse (Nederlands: Renesse) is een badplekke op Schouwen-Duveland. Renisse is bekend deu onger meer Slot Moermond en van ut Straôrieje. D'r komme vee Duutsers. In 2024 hao 't durp 1.490 inweuners.

Liggienge

Slot Moermond

Renisse 'Olland Strange

Op Renisse is vee drukte deu 't toerisme. Zô è mn aoltied op woensdagochen mart. Dâs best wè gezellig. t Oor wat minder as tr in dezaalfde weke op zaeterdag n nachmart is. Want dat doe ze n paer keer in de zomer. t Is zaalfs gebeurd dat r drie keer in êêne weke mart was. Die mart is trouwes nie zô as vroeher, want toe wier dr nog wè s gezeid. dat n gulden op de mart n daelder waerd was. Nog vee gezelliher is de Renissese mart (kaarmisse). Dâs dienk ik wè êên van de grôôtste van Zeêland. De waehes komme op woensdag anrieje nae ofloap van de weekmart in vanof dat memènt kan Endrik t durp nie mî zie, want dan staet r wat êêl oags vlak vô zn deure. De Renissese mart briengt vee leut vô de badhasten, in de gemêênte eitr vô gezurgd dat t leven nie mî zô aarg is as jaeren elee. Dust daer è mn dan n bitje vree mee. Dn aore weke op donderdag bin de mêêste waehes soches â verdwene in smiddegs leit t durp dr wî schôôn bie, want die kaerels van de gemêênte è dan bienae aoles â gedae. Dat è’k noe wè wî eleze van Renisse. De baes van de polisie op ons eiland ei teminsten ezeid, dat daer de overlast vô omwonenden is toehenome. Jao, vin j’t gek? Dat wiste wulder allank â. De gemêênte ei ‘n paer jaer elee de slutiengstieden vô de horeca van twî naer drie ure snachs verzet. Ik g’loave dat ‘n proef was. Noe, die is dust dudelijk mislukt. ‘t Zâ, dienke wulder, wè nôôdig weze om die tieden wî trug te draoien naer twî ure of misschien wè naer twaolf ure. Want de polisie ei ok ezeid, dat ‘r toch ‘s ’n keuze emaekt mot ‘ore. Wille je noe eihenlijk ‘n femieljebadplaes ‘ore of nie? Noe, baes van de polisie, ik kan je dat êêl dudelijk zaahe: dat wille ze nie. Ze roepe dat â jaeren, mâ ze wille ‘t nie. Want die overlast, daer geve ze âghêêl nie om. ‘t Persenêêl van de horeca gae pas nae vier ure naer uus in dat doe ze ok nie stille. Misschien zou wet’ouwer Verseput toch ok ‘s mit de omwonenden motte praete in nie enkelt mit de sector.

D’r bin de leste jaeren vee nieuwe dunen te zien. D’r is eihenlijk ’n êêl nieuwe duunreke vô de ouwe gekomme. ’n Môôi gezicht. Diepe daelen, nog êêmae zonder struken. Of de toeristen dat net zô waerdeêre weet ik nie, mâ ’t bin plekken waer of je aoltied vee kinders zie spele. D’r stae borretjes “verboden toegang”, mâ daer è de badhasten gin booschap an. Ik è daer de Stichtieng Duunbe’oud nog noôit over ore klaehe, twint dat ’t toch eêl kwetsbaere netuur is. Ze ê wê ulder meênieng ehee over de paer kitebuggyers op ’t Verklikkerstrand. ’n Eêl breêd strangd waer of je die sport goed kan beoefene. De badhasten ê d’r gin last van, want die bin daer nie zô vee, ’t is te varre wegt. De duuntjes ê d’r ok gin last van, want de sporters bluve dichter bie de zeê. Mâ d’r bin ok duzende veuhels in dan laet de Veuhelwacht Schouwen-Duveland d’r eihe ‘oôre. Volhes Gert-Jan Buth ê die veuhels last van dat kitebuggyen. Noe è ik daer nog â ’s eloape in â je lengst zô’n groôte kro strangdloapertjes in meêuwen loapt bluve ze gewoon zitte. Kom je aarg dichtebie, dan vliehe ze ’n rondje over ’t waeter in achter je rik komme ze naer benee om ulder ouwe plekke in te nemen. Dust ik dienke dat ’t verstoren van zô vee veuhels aarg meevaolt. Ok â, omdat ’t strangd zô breêd is, dat sporters in veuhels mekaore nie biete. Indertied was de Veuhelwacht ok â tehen ’t fietspad lengst de Oôsterschelde, want die paer fietsers zouwe de rust van die duzende beêsjes verstore. Ik dienke eerder dat ’t andersomme is. ’t Fietspad leit ‘r gelokkig â jaeren in â je ’t mien vraegt bin d’r enkelt meer veuhels ekomme

Zie ok

• De tôôvervrouwe van Biesterveld

Lienks nae buten

• Renesse.startpagina.nl
• RenesseAanZee.nl
• Plaatsengids
• AlleCijfers