Kleverskerke
Kleverskerke of gewoon Klevers is 'n klein durp in de gemeênte Middelburg, noôrdelik van Erremu. Mee minder as onderd inweuners (55 in 2023) is 't eên van de kleinste durpen van Nederland. 't Is 'n Walchers kerkdurp mee 'n kom rond 'n durpskerk, maen die kom bestaet maer uut eên straete, de Durpsstraete. De kerke wier in 1671 gebouwd op de plekke van 'n ouwere kapelle, die d'r a zeker vanaf de dertiende eêuwe stoeng. Kleverskerke leit vreêd geïsoleerd en rustig en is nie verbonde mee 'n wegt van eênig belang.
De plekke wier vò 't eêrst vermolde in 1251; z'ao toen 'n kapelle. In de zestiende eêuwe wier 't groôt genoeg gevonde vo 'n eige parochie. Van 1679 toet 1780 was 't in anden van 'n Middelburgse erenfermielje Van den Brande. 'n Steên mee ulder fermieljewaepen is nog an de durpsstraete te zieën. Nae de oprichtienge van 't Konienkriek van de Nederlanden was 't toet 1857 'n eige gemeênte; die-a in dat jaer as eên van de eêrste in Zeêland wier opg'eve omdat 't durp eêl klein was en nie groeide. 't Durp goeng bie Erremu ore. Sins 1997 leit 't in de gemeênte Middelburg. De burgemeêster van die stad, L.B.H. Spar van der Hoek, kreeg toe plannen om 't gebied bie Klevers onder waeter te zetten vò sportrecreaotie. Op de eerste versie van die plannen kwam 't durp zelfs nie meêr vò; bie vergissienge, bleek laeter. Toch bleef d'r vee verzet tege. Naedat Spar van der Hoek weggoeng wiere die plannen in d'ieskaste gezet.
Lienks nae buten
bewerk
| Gemeênte Middelburg |  |
|---|---|