Schouwen-Duvelands
't Schouwen-Duvelands is 't Zeêuwse dialect dan ze op Schouwen-Duveland praote. Soms oor 't verdeêld in Schouws en Duvelands.
't Schouwen-Duvelands vurmt saeme mee 't Goerees, 't Flakkees en 't Svores 't Noôrd-Zeêuws. D'r bin kleine, mae dudelike verschillen tussen deêze dialecten an d'n eêne kant en bevobbild 't Walchers en Zuud-Bevelands an d'n aore kant. Zoô komt d'n umlaut van de o ier vee minder vò: boter, wone en zomer in plekke van 't zudelike beuter, weune en zeumer. Vedder deêlt 't feitelik aolle kenmerken die-an van 't Zeêuws maeke wat-of 't is.
D'r bin ok dudelike verschillen binnen 't Schouwen-Duvelands. Speciaol opvalle doeë de dialecten van Bru en Zurrikzeê. 't Eêrste deudat de woordenschat nog stik ouwerwès is (dat ei-je wè dikkelder in vissersdurpen), 't tweêde deu 'n bitje meer Ollandsen invloed, wat-a noe eên keer typisch is vò stadsdialecten.
't Meêst leeft 't dialect nog in Bru, daer-a meêr as 90% van de joengeren 't nog praot. Saeme mee Erremu en Waschappel oort 't daemee toet de plekken daer-a 't Zeêuws nog 't sterkst present is. 't Minste leeft 't in de toeristendurpen Aemstie, Burgh en Renisse, daer-an vee mensen van buten bin gae weune.
'n Bekende Schouwse schriever is Endrik Henk Blom, die-a dialectcolumns schrieft in 't uus-an-uusblad Ons Eiland en ok ijt'n paer boekjes uut ei eheven bie Uitgeverij: Boekhandel de Vries, Zierikzee.