Dukers

Dukers
Taxonomische indeêlienge
Riek: Beêsten (Animalia) Stamme: Chordabeêsten (Chordata) Klasse: Veugels (Aves)
Orde
Gaviiformes (Wetmore&Miller, 1926)

Dukers bin veugels uut de orde Gaviiformes, de femielje Gaviidae en 't geslacht Gavia. De orde eit dus maer eên fermielje en de fermielje maer eên geslacht. 't Bin in 't waeter levende veugels die in Noord-Europa en Noord-Amerika te vinden bin en noga veugels uut de orde Waeterveugels lieke, maer d'r nie mee verwant bin.

Evolutie en fossielen

Zoôwel anatomisch as chemisch ei uutgeweze dan de dukers 'n eigen orde vurmen en nie naeuw verwant bin mee aore veugelsoorten. Dat zou moete beteêkene dan de eêste dukers al in 't Mesozoïcum bestoenge. De ouste fossielen die mee zeker'eid an 'n duker kunne ore toegeschreve stamme uut 't Mioceen, maer Neogarnis en Polarornis uut 't laete kriet ore dikkels ok an dukers toegeschreve.

Uterlik

Paerelduker (Gavia arctica)

Dukers bin grote zwummende veugels mee 'n lichaemslengte van tusse de 53 en 91 centimeter en 'n vleugelspan van tusse 106 en 152 centimeter. Ulder gewicht lei tusse de 1 en 6,4 kilogram; de groôste soorten bin daemee bedudend zwaerder as ganzen. Van de futen verschillen ze voraol deu complete zwemvliezen, die-an de drie nae vore gerichte teeën van de veugelpoôt verbinde, as ok deu 'n goed zichtbaere staert, al is t'n ok maer kort.

Dukers è 'n gestroômlijns lief, dat-a vreêd goed an 't leven in 't waeter is angepast. De poôten stae ver achter an 't lief en loôpe uut in groôte zwemvliezen, zoôdan ze d'r eige perfect deu 't waeter kunne bewege.

Ulder vere bin in 't zeumerkleêd bie de meêste soorten an de bovenkant schaekbordachteg zwart-wit gekleurd; alleêne bie de roôdkeelduker is 't eênkleureg griesbruun. An d'n onderkant is 't bie aolle soorten naebie wit. 't Is eel dicht en isoleert goed tegen de kouwe van 't pool- en subarctische waeter daer-an ze im zwemme. Kop en als bin bie aolle soorten eel bont. Ulder winterkleêd is wat minder riek an kleuren. Ventjes bin wat groôter en zwaerder as wuufjes; aors is d'r gin structureel verschil in uterlik tusse de beide geslachten. Joenge dukers lieke 't eêle jaer deur op volwasse veugels in winterkleêd; pas nae ongeveer drie jaeren kriege ze voor 't eêst 't volwasse zeumerkleêd.

Soorten

D'r bin vuuf soorten:

• Roôdkeelduker (Gavia stellata)
• Paerelduker (Gavia arctica)
• Pacifische paerelduker (Gavia pacifica)
• Iesduker (Gavia immer)
• Geelsnaevelduker (Gavia adamsii)