Slag om de Sloedam
De Slag om de Sloedam (Iengels: Battle of Walcheren Causeway) was een ongerdeel van de Slag om de Schelde tussen de vuufde Canadese Infanteriebrigade en de troepen van het Duutse vuuftiende leher in 1944. Het was ien van de verschillende slaegen die uutgevochten wiere rond het eiland Walcheren tiejens de Slag om de Schelde.
In dom Friesch weergegeven
bewerkNa het uutbreken van het Britse 2e Leher en het Canadese 1e Leger vanuut Normandië in begin september 1944 ontstonge vee logistieke problemen. De anvoerlijnen wiere steeds vadder opgerekt en de bevoorraeding wier een zwaere last voo de geallieerde lehers. Het koppig verdedigen van de haevensteden an Het Kanaâl deu de Duutsers betekende dat groôte 'oeveelheden bezîne wiere verstookt deu de vrachtwaegens die nôdig waere om de voorraeden vanuut Normandië nae de nieuwe frontlinie in Belhië te briengen. Mie het veroveren van Antwerpen kregen de geallieerden de beschikking over een diepwaeteraeven, mae de Duutse posities aan weerskante van de Westerschelde maekten het bezit van de 'aeven nutteloôs. Om de 'aeven te kunnen gebruuken moeste de Duutse linies in Zeêuws-Vlaenderen en op Walcheren en Zuud-Beveland op'eruimd worre.
Vòspel
bewerkOp 31 oktober 1944 was het 'ele hebied rond de Westerschelde, mie uutzondering van Walcheren, ontrukt an Duutse controle. De kustbatteriejen van Walcheren waere echter in staet ielk vrachtschip het waeter uut te blaezen.
De 2e Canadese Infanteriedivisie was vanuut Braebant het schiereiland Zuud-Beveland in'etrokken. Al marcherend en vechtend 'ao ulder tegen 31 oktober aolle tehenstand opgeruumd. Zuud-Beveland was toe nog verbonden mie Walcheren via de smalle Sloedam, 40 meter breêd en 1600 meter lang.
Plannen om anvalsboôten in te zetten voo de anval over de Sloe wiere verijdeld deu de modderige slikken.
De slag
bewerkDe "C"-compagnie van de The Black Watch (Royal Highland Regiment) of Canada was de eerste eeneid die de Sloedam besturmde. Ulder sturmlôop mislukte en ze leeje zwaere verliezen.[1] Gedurende de anval ontdekten ulder een diepe kraeter in de dam. De bovenkant van de dam was deu de Duutsers gedeeltelijk opgeblaezen om te dienen as tankversperring. De Canadezen gebruukende de kraeter later als compagnies-commandopost.
De "B"-compagnie van de Calgary Highlanders waeren de volgenden om ten anval te trekken. Ok bie ulder lukte het nie. Een nieuwe beschieting wied voorbereid en majoor Bruce McKenzie's "D"-compagnie kroop nae voren onger zwaer vuur. Ulder kwammen dit keer wel an de Walcherse kant van de dam in de ochend van 1 november.[2]
De Duutsers ongernamme zwaere tehenanvallen, wibie onger meer vlammenwerpers wiere ingezet tegen de Canadezen. Op een gegeven moment waere aolle officieren van de "D"-compagnie doôd of gewond, waerop majoor George Hees het commando overnam.
Compagnies sergeant-majoor "Blackie" Laloge van de Calgary Highlanders kreeg vanwege um z'n biedraege an de gevechten de Distinguished Conduct Medal toegekend. De gevechten vonge op zo'n korte afstand plaes dat um Duutse 'andgranaeten terug kon gooien voo die tussen z'n manschappen ontploffende.[3]
Tweê pelotons van Le Régiment de Maisonneuve namme op 2 november het bruggenoôd op Walcheren over. Ulder wiere wee teruggedrongen tot op d'n dam. Een bataljon Highlanders kreeg opdracht deu de linies an te vallen, mar ok ulder lukte het niet.[4]
Naesleep
bewerkLandingen deu Britse commando's van de 4e Commando Brigade beslisten ten slotte over het lot van de Duutse verdedigers op Walcheren. Vanof zeê voerden ulder landiengen uut bie Weskappel en Vlissienge. Dirmee wier de slag om de Sloedam een kostbeare, en uuteindelijk onnôdige, afleidingsmanoeuvre.[5]
De Calgary Highlanders verloren 64 man in de drie daegen van gevechten op de Sloedam. "The Black Watch" verloor 85 man in de periode van 14 oktober tot an 1 november 1944. De meêsten bie de gevechten rond de Sloedam.[5]
Nae d'n oorlog
bewerkDe "battle honour" Walcheren Causeway wier deu de Canadese rehering toegekend as een apart eêrbetoôn aan de eenêden die 'ier vochten, naest de "battle honour" The Scheldt.
De Slag om de Sloedam wordt jaerlijks 'erdacht deu The Calgary Highlanders mie een kerkdienst en een parade, wivoor ok Canadese Nederlanders worre uutgenôdigd. In de jaeren 80 is bie de inmiddels voòmaelige Sloedam een monument opgericht en ingewijd. De Sloedam as zôdaenig bestit nie meer, noe het land aan weerskan'n is ingepolderd. Resten van Duutse fortificaties bin echter nog steeds te vinden op Zuud-Beveland en Walcheren.
In de 21e eêuw bin de monumen'n verplaetst vanwege verbreêjing van de A58 en de spoorlijn (Zeeuwse lijn) over de dam.
Externe verwieziengen
bewerk- Walcheren Causeway. Lest bezocht op 31-10-2009
- Personal Narratives - Walcheren Causeway. Lest bezocht op 31-10-2009
- ↑ Black Watch War Diary
- ↑ Bercuson, David Battalion of Heroes: The Calgary Highlanders in World War II
- ↑ Farran, Roy History of the Calgary Highlanders 1921-1954
- ↑ Stacey, C.P. Official History of the Canadian Army in the Second World War. Volume II: The Victory Campaign
- ↑ 5,0 5,1 Copp, Terry The Brigade