Ossenpikkers

Riek:	Beêsten (Animalia)
Stamme:	Chordabeêsten (Chordata)
Klasse:	Veugels (Aves)
Orde:	Passeriformes (Zangveugels)

Femielje

Buphagidae
(Brisson, 1760)

De femielje van de ossenpikkers (Buphagidae) besti slechs uut twi soôrten die an beie in Afrika ten zuuden van de Sahara leven. Ze wiern eêst inedeêld bie de spreêuwen (Sturnidae), mè bleken een totaâl are femielje te wezen.

Kenmerken

De twi soôrten ossenpikkers èn beie een bruune staert en veêrnkleêd, en een helihe buuk. Ze zien middelhroôt en èn sterke poôten, zodan ze vee hrip ène. De twi soôrten ossenpikkers verschill'n van mekaor in de kleur snaevel, de een ei een hele en de are een rooie snaevel. Ossenpikkers leven in oop'n hebieden as savannes. Ossenpikkers broeien in hoôlen, wiran ze een nist bouwen hemikt van de aeren van der hastheêld. Ze lèn twi tot drie eiers.

Saemenleviengshedrag

De naem ossenpikker is logische te verklaeren. Ossenpikkers vin'n der eetn, vurral teken en are parasieten, op den uud van zoogdieren. Ze eten vurral larven. Deze symbiotische relatie wier vaâk edocht as ziende mutualistisch.

Echter, 't favoriete eetn van ossenpikkers is bloed. Ze vang'n de teken die an volezohen zitt'n bie bloed, en ze pikken ok de won'n van de zoogdieren oop'n zodan der meêr parasieten in komm'n en dus de zoogdieren vee vatbaerder voe ziektes worn. Iermie is dus bewezen da de relatie tussen de ossenpikkers en de zoogdieren nie mutualistisch is, mè hedeêltelijk symbiotisch en parasitair.

Indeêlieng

De femielje van de ossenpikkers besti uut de volhende twi soôrten:

Heêlsnaevelossenpikker Buphagus africanus
Roôdsnaevelossenpikker Buphagus erythrorhynchus