Wasschappels

't Wasschappels is de naeme vo't dialect dat in't durp Wasschappel op Walchren oor esproke.

't Wasschappels verschilt flienk mee oare Walcherse dialecten deur de isoloatie wi'int elege ei. Toch bin der ôok nog genoeg verwanten mee oare Zeêwse dialecten.

Kenmerken

't Wasschappels stel z'n'eige ten opzichte van't Walchers op as een buutenbêentje, 't ei verscheië overéenkomsten mee't walchers mè ôok genoeg verschillen, die bie vo'beeld wè op Zuud-Beveland vo komme.

Klanken

De meêste klanken komme groôtendeêls overéne mee de rest van Walchren, zoô oor 't 'Ollanse 'maken' 'maeken' en oor 'zoon' zeune. Mè in plekke van 'meuge' is't in Wasschappel gewoon moge.

De 'aa' oor dus zo'as a ezeit in 'ae', mè in niewerwesse woorden, veranderd 'aa' in 'oa' zo'as in koarten.

In Wasschappel zeië ze wè net as in de rest van Walchren 'mee' vo 'met', mè gin 'af' in plekke divan zeië ze 'of' net as op Zuud-Beveland.

Grammaotica

Abstracta die-an van werkwoorden ore afgeleid kriege d'n uutgang -ienge: verkerienge, krusienge etc. net as op de rest van Walchren.

Voltooide deêlwoorden ore mee 't vòvoegsel e- gevurmd. In de rest van Walchren zeie ze gemaekt.

Woorden

Wasschappelse woorden verschille eêl vée mee de rest van Walchren en Zeêland, dit komt deur't isolement wi in't lag. Zoô zeie ze 'freinzen' in plekke van 'frinzen' en 'lisdodden' oore 'roôkers enoemt. Vo nog vée meer typische wasschappelse woorden moe je mè op de volgende lienk klikke: http://www.westkapellecultuurbehoud.nl/cultuur/taaldialect

Op schrift en in de zang

't Zeêuws oor nie landelik erkend. In Waschappel è ze de gemeênte toch wè zoôver gekrege om 'n straete 'n Zeêuwse naem te geven.

D'r bin nie zô eêl vée dialect-ziengers of -schrievers, mè De Wasschappelse Toneelploeg schrieft a jaeren vaesjes en toneêlstikken in Wasschappels, varder is ter in Wasschappel as eênige in Zeêland een straetnaembordje in't zeêuws.

Dialectverlies en be'oud

In Wasschappel oor der over't algemeên nog vée dialect eproate, meer as op oare walcherse durpen. Der oor nog onder de joengere nog ongeveer vo 90% dialect eproat, en de 10% die gin dialect proat, kom over't algemeên van buûtenof.

Lienks ni buûten

• http://www.westkapellecultuurbehoud.nl/cultuur/taaldialect

Dit artikel staet in 't Wasschappels