Wasschappel Laeg
'T Noorderhoofd (of Wasschappel laeg) is de naem van de tweêde viertoren in Wasschappel tur onderscheidienge van de 'ooge viertoren in het durp. De viertoren is een rieksmonument.
Midden op de Zeêdiek in Wasschappel staet 't kleine viertorentje. Dizze gietiezdere toren uut 1875 is ontwurpe deur Quirinus Harder, die oôk veé andre 'Ollandse viertorens ei ontwurpe. De viertoren ('t iezder) is emaekt deur iezdergieterij Nering Bögel in Deventer. Dizze toren vurmt saemen mee 't 'ooge licht een lichtlijn ni 't Oostgat.
De toren is roôd, mee een witte band. 'T licht van de toren ei 3 kleuren; roôd, wit en groene. Dit is escheie deur een soort gurdientjes. As de schipper de roôie sector ziet, moet'n onmiddellijk z'n koers wiezege. De witte lichtsector is 6000 candela, de roôie en de groene beide 1800 candela.
An de voet van de toren ei een ebouwtje estae dat ebruukt wier deur de Kustwacht. 'T wier in de jaeren zestig van de twintigste eêuwe ebouwd van beton en baksteên, as vervangienge voh een kleiner kustwachtebouwtje, wat di sinds 't begin van de twintigste eêuwe stoeng. Naeda de kustwacht uut 't ebouwtje was vertrokke raekte 't in zeer vervalle staet en was 't regelmaetig onderhevig an vandalisme. In 1995 is 't esloôpt omda ter gin nieuwe bestemmienge voh 't ebouwtje evonde kon oôre.