VV SNS is een voebalclub uut Stad an 't Haeriengvliet. In 1946 wier de club op'ericht as VVS, in in dat eerst seizoen wier de club al kampioen van Flakkee. We gienge dan mit de uut wedstrijen mit un vrachtwaegun van Trommel. Over de bak was un zeil gespanne, in dur stoende veilingkissies om op te zitte. Je hobbelde oendur weg van de ene naer de are kante van de auto deurdat de verieng niet al te best was, in de wegen waare aak niet wat ze noe binne. Zoon ritje heen in terug mit de vrachtwaegun naer Nieuwe Tonge koste 7 nederlandse zulvere guldens.

Wielle hadde toen aan un koolketter, Bram Wagner kon zo hard schiette dat menege keeper de bal niet zag gaen mar alleen mar hoorde fluite, in hareken schoot tie de bal zelfs dwars deur hut net heen.

Je had toen aak un Flakkees elftal, daerin voetbalde de beste speulers van Goeree-Overflakkee. Jaas Mellaard, Aren de Gans in Aai Arensman wiere daer regulmatig voor gevraegd.

VVS voetbalde toen in de baagerdreef, daer waer noe Malieflouwer zit. Daer stieng toen un houte keet as kleedkaemer. Wasse kon je je eige daer niet dat most je thuus mar doen.

In 1947 most de naem van VVS verandert worre, omdat tur al un club was in de RVB mit die naem, dus toen wier hut SNS. Deur de jaeren heen is SNS menig keertje kampioen geworre, mar aak menig keertje gedegradeerd, hut Volendam van Flakkee.

Boot bewerk

Voor veel jonges was 't een probleem da ze op zaeterdag zekur tot 12 ure moste waareke. Dat was lastig bie uut wedstriejen. Ze moste dan bevoorbeeld om 11 uur weg om de boot van half twaaluf te kenne haelen, dus gienge ze op de fiets naer Meneerse hood, dan mit de boot naer Hellevoet, in an de overkante mit un bus naer hut veld van de tegunstandur. As ze gelok hadde kwamme ze daer op tied an, soms was hut zo kort an dat ze in de bus moste verkleeje. Aak as ze uutgevoebalt waare moste ze soms drek de bus in, zoendur te wassus of te verkleejen. Verkleeje most dan mar in de bus in dan tuus mar in de teile om je eige te wassun, want je most de boot haele. Meestal waare ze dan tegun un uur of achte savens weer terug op stad. Dan wist je pas of ze verlore of gewonne hadde, dur wier nog niet gebeld de meeste hadde geen telefoon in aak tuus niet as je most belle gieng je naer Piet de kappur. In toen hadde we zekur geen mobieltje.

Dur waare maasun die an de overkante waarukte in die gienge dan deur de week mit de boot vanuut Menheerse naer de overkante. Die hadde allemaele un weekkaert voor de boot die was 6 daegun gelkaert. Om kostun te bespaerun wiere bie de maasun die an de overkante waarukte de boodkaertun opgehaeld in an de jongus gegeve die moste voetballe.

Zo zieje dat as je lid was van un verenigieng je aerdug wat geld kwiet was om un partijtje te voetballun. Un ure verlette, op de fiets naer Menheerse-hood, in as je geen bootkaerte had op de boot betaele (un retourtje koste toen al 1 gulde vuuftien) in dan nogus betaele voor de bus.

Lienk nae buuten bewerk