Standbeêld Michiel de Ruyter
Het standbeêld van Michiel de Ruyter stit op Boulevard de Ruyter in zien geboorteplekke Vlissienge. Het gietiesdere standbeêld uut 1841 is van de hand van de Vlaemse beeld'ouwer Louis Royer. Opt beeld is De Ruyter te ziejene, staende op een scheepsdek mee de rik nae 't stuurwiel, mee een kieker in zien hand en de aore hand in de zieje. Sinds jaer en dag doet in Vlissienge 't verhael de ronde dat De Ruyter, bie wieze van grap van de beeld'ouwer, een klein honge'ie onger de aerm ao. Vermoedelek betreft het 'ier echter een rol pepier[1]. Het beeld wor in de volksmond 'Michieltie' 'enoemd. Ok de Hongaorse stad Debrecen ao een standbeêld van de Vlissiengse zeêheld. De Ruyter redde 'ier in 1676 26 Hongaorse gereformeerde predikanten van de slaevernieje.
Uut kostenbespaerieng was d'r voo 'ekozen De Ruyter nie in dier brons te gieten, mar gietiesder dat naederhand groen 'everfd kon worre omt beeld toch een enigszins bronsachtige uutstraeling te gevene. De eerste steên van de sokkel is 'eleid op 29 april 1840 deu vice-admiraol Gobius, weerbie een looie koôker mee een perkamenten rolle wier in'emesseld[2]. Op 9 auhustus 1841 kwamt beeld van De Ruyter, op een boôt van de Koninkleke Meriene in Vlissienge[3]. De Ruyter wier mee kenonschoô'en vanof de boulevard in zien geboorteplekke begroet. Het beeld wier 'eplaest opt De Ruyterplein. De officiële onthullienge vant standbeêld volgende op 25 auhustus 1841 deu konieng Wullem II[4].
Het standbeêld van Michiel de Ruyter is een rieksmonument.
Literature bewerk
- A.F. Franken. Walcheren in het spoor van bedrijf en techniek, Stichtieng Natuur- en Recreatieinformatie, Middelburg, 1988.
- Ad Tramper. 'Michiel de Ruyter op een voetstuk', in: Zeelandboek 10, Middelburg, 2006.
- P.C. Verhoef. Gedenkschrift der oprigting van het Standbeeld voor M.A. de Ruyter, plegtig ontbloot te Vlissingen, den 15 Augustus 1841, Vlissienge, 1842.