Saterfries

't Saterfries (eige naem Seeltersk) is 'n taele die-a nog deu 'n stik of 2000 mènsen gesproken oor in de Duutse gemeênte Saterland, in de staet Nedersaksen. 't Is 't leste restant van 't Oôst-Fries dat-a nog bestaet. Awast is 't verwant mee 't Fries uut Nederland, 't is wè 'n aparte taele; Saterfriezen en Nederlandse Friezen kunne mekaore glad nie verstae. Ok 't Noord-Fries, wat-a 'eêl in 't noorden van Duutsland oor gesproke, is weer 'n aore taele.

Tweêtaelig bordje bie d'n ingang van 't durp Scharrel/Skäddel in 't Saterland.

In vergliekienge mee de aore Friese taelen is 't Saterfries nog vreêd ouwerwès, voraol as 't op de klanken ankomt. Oppervlakkig klienkt 't 'n bitje as 't omriengende Platduuts, daer-at 't ok zeker 'n paer vernieuwiengen mee gedeeld ei.

Vandaeg d'n dag oor 't Saterfries sterk bedreigd; de meêste mènsen van nae 1950 praote Platduuts of 'Oôgduuts. Toch ka je de taele nog vee tegekomme op opschriften en zò; de Saterfriesen bin d'r zeker nog groôs op. Ok op 't internet is t'r 'ier en daer Saterfries te lezen; de taele ei bevoorbeeld d'r eige Wikipedia. 'n 'Oôpe onderzoek nae de taele is gedae deu de Nederlandse Fries Pyt Kramer en d'n Amerikaon Marron Curtis Fort.

Wikipedia

Deze taele ei d'r eigen Wikipedia. Bezoek de Saterfriese variante.