Provinciale Zeeuwse Courant
D'n Provinciale Zeeuwse Courant (PZC) is 'n regionale krante die a veural nieuws en berichen uut Zeêland briengt. D'n PZC is onderdeêl van Wegener. 't Oôfkantoor is te vinden in Vlissienge. D'n krante ist fusieresultaet van 'n aantal oare kranten zoa de Hoesche Courant, D'n Middelburgse Courant, d'n Vlissiengse Courant, d'n Bresjesse Courant en de Zurrekzeêse Nieuwsbode. Ekeke nae de leeftied van de veurhangers ist een van den ouste krante van eel Nederland. In't joar 2008 bestong de krante 250 joar.
Op 6 feberwari 2007 is de krante veranderd nae tabloid-hroote.
De PZC ei vier edisies: Walchren, Beveland/Tole, Duveland en Zeêuws-Vlaonderen. Den oplage lig rond de 58.000.
250 jaorig jubileum
bewerkOnderstaond stikje is geschreven nao anleiding van het 250 jaorig jubileum in 2008:
Het is wi a een weke gelee, mè 'k bin nog mè nauwelijks bekomme van aole emoties rond de krante, die a 250 jaer bestoeng.
Omda ze vinde dat ik een eêl klein râdertje in de PZC-machine bin, was ik ook uutgenôdigd om d'r bie te wezen toen de kôninginne 't eeste exemplaâr zou kriehe van 't gedenkboek. Wederhelften konde nie mee, wan dan zou't te vol raeke..! Mee Rinus Willemse, je weet wè, die dialectschriever van d'overkant, zou 'k saemen onze streektaâl vertegenwoordige!
D'n aeven vôda'k nè de feêstelijke angelegenheid zou hae, wier ik a vroeg verrast. Di viel een boek mee een hrôte dreun op de deurmatte. Het jubileumboek, in plastic verpakt, lag di zômè in ons simpele Zoetelandse rijtjesuus. Ik kreeg het eeste exemplaâr...! Wat was ik hroôs! De kôninginne kon 'k wè belle, da ze tuus kon bluve..!
Laeter bleke d'r eêl vee mensen a 't eeste exemplaâr gekrege t'ebben, wan ook Rinus uut Biervliet ao d'r a eên! Dat viel even tegen. En de 'mooiste taele van oalemaele' kon 'k nie vinde in 't boek. Mè verder zag 't er prachtig uut! Pet af vô de maekers!
Ik bin toch mè gehae nè de hrôte kerreke in Middelburg. Rinus en ik kunne gelukkig nog rustig over straete lope en m'aode nie 't idee dat t'r ook vô ons het eên en ander an sterke mannen op de beên was. Ik ao verwacht, da'k in ieder geval moest antône wie a'k was. Misschien zouwe ze me wè fouillere..! Mè niks d'r van ô! Het belangriekste was...je postcode! En an d'and divan kwaeme me binnen.
De plekken waere vrie en alleên in 't middenschip mochte me nie komme. Di zaete zeker de allerbelangriekste figuren! Ik zag vee bekende gezichten, bekend van de krante en van de tillevisie.
Mensen uut de polletiek, uut het bedriefsleven en weet ik aol nie wi a ze vandaen kwaeme. De juuste naemen bie gezichten wete viel nie aoltied mee, mè saemen kwaeme me d'r uut. En toen a'k zag, dat de oud-commissâris van de kôninginne in dezelfde rij zat as ik, wist ik zeker da ze bie de PZC behoorlijk sociaâl bin! Toch aode d'r eêl wat d'r wederhelft bie d'r...! Ik ao nog een plekke nest me over houwe vô de kôninginne, as ze es wat laete mocht weze..! Mè dat was nie nôdig! Di kwam wè een vrouwe mee een mooie witten oed nest me zitte, mè die ao hin blauw bloed, hloof ik!
M'ebbe eest wat sprekers anhore. Eigenlijk is 'ore' 't goeie woord nie, wan 't geluud was bie ons zô slecht, da'k nie vee verstaen ebbe. En van wat a'k horen ebbe, bin 'k wi a vee kwiet...! Het ging over de krante, over vroeger, noe en laeter! En di wier goed geklapt. Het leek wè of ze blie waere...!
Toen kreeg de kôninginne dat boek, hetzelfde as bie mien op de deurmatte gevalle was. Alleên hin plastic d'r rond. Ik kon nie zie of ze d'r blie mee was, wan d'r oed zat divô in de wege. Ze begon d'r drek in te blaederen. Ik dienke op zoek nè dialectverhâlen. Ze za ze nie gevonden ebbe! Mè dat komt dan wè in 't volgende jubileumboek. Dan is dialect schrieven echt nieuws hore!
De kôninginne liet ons achter bie de drankjes en de hapjes. Toen me saemen deu Middelburg liepe, op weg trug nè Zoetelande en Biervliet, vloog ze net boven de stad. Ik docht, da'k ze zag zwaâie mee d'r boek. Zie blie mee d'r eeste exemplaâr..!