Instrumentalis

D'n instrumentalis is 'n naemval die in verschillende taelen bestaet. 'Ie drukt uut waermee-at 'r wat gedae oort. Zò kunne je bievèbeêld uut 't Russische рука roeka 'and', рукой roekoj maeke, wat 'mee d' 'and', 't'r and' beteikent.

D'n instrumentalis is eên van de acht naemvallen die vò d' Indo-Europese taelen kunne ore gereconstrueerd. Je kunne 'm onder meêr vinde in 't Sanskriet, en in de meêste Slaovische en Baltische taelen. Ok vee nie-Indo-Europese taelen è 'n instrumentalis.

't Aollerouste Germaons moe ok nog 'n instrumentalis g'aod è. In de meêste taelen, ok in d'ouwe, is t'n mee d'n daotief gae saemevaolle. In 't Oudiengels en Oud'oôgduuts is die ontwikkelienge nog nie glad t'n ende: bie zelfstandige naemwoôrden is d'n instrumentalis a verdwene, mae bie de bievoegelijke eit 'n nog aparte vurmen. Resten van d'n ouwen instrumentalis in 't moderne Zeêuws bin 'oe (uut wat, dus feitelijk beteiken dat 'waemee') en te in 'n verbienge as des te grôter (uut dat, dus feitelijk 'daemee', 'daedeu').