Die Schuldigkeit des Ersten Gebots
Die Schuldigkeit des Ersten Gebots (KV 35) is een werrek van Wolfgang Amadeus Mozart, wat 'n in 1767, op elfjaerige leeftied componeerde. 't Libretto is geschreve deu I.A. Weiser. Van Mozart is alleêne 't eêste deêl; deêl II is van Michael Haydn, deêl III van Anton Cajetan Adlgasser. Van deêl II en III is de muziek nie bewaerd gebleve.
Die Schuldigkeit oor soms beschreve as Mozart z'n eêsten opera, mae oor dikkels ok bie z'n (weinige) oratoria ingedeêld. D'n opzet is net as bie 'n opera, mee afwisselend aria's en recitatieven, mae 'n echten opera is in principe waereldlijk en Die Schuldigkeit is geêstelijk. 't Stik staet in de traditie van 't jezuïtisch schoolspel, wat-a de leerliengen van 't Salzburgse gymnasium sind jaer en dag elk jaer opvoerden. Muziekweêtenschappers dienke da z'n vaer (Leopold Mozart) Wolfgang bie de compositie g'olpen ei; zien 'andschrift is in d'n otograaf vromme te zieën. Die Schuldigkeit moe in de eêste maenden van 1767 gecomponeerd weze; op 12 maert was de opvoerienge.
't Stik is bezet mee 'n 'oôpe allegorische figuren: de christen, de geêst van de waereld, de geêst van Christus, de Barm'artig'eid en de Rechtvaerig'eid. Deze figuren praote mee mekaore over 't Eêste Gebod ('Je moete gin aore goden vo Mien angezicht 'ebbe'): dit gebod liek zonder beteêkenis in d'n tied dat iedereêne christen is, mae feitelijk, zò is de boodschap, dienke de mènsen voraol an ulder lusten, eige belang, geld en zò, en vereêre ze dat neffens God. 't Werk is bedoeld om de 'oôrders dat bie te briengen.
Lief'ebbers en kenners bin over 't algemeên nie zò te spreken over de muziek. David Humphreys vond da gin van de aria's karakter ao, en dan de recitatieven mae wat 'oekig waere. Toch aod 't werk succes, en bos daenae kreeg Mozart opdracht vò 'n nieuwen opera, Apollo et Hyacinthus. Dien opera kwam in mei op de planken.
Bron
bewerkH.C. Robbis Landon (ed.), Het Mozart Compendium, Baarn 1990 (vertaelienge van The Mozart Compendium, Londen 1990): pp. 224, 308, 310