De Gooischiêters

't Gooischiêten in Waschappel stam nog uut de middeleeuwen. In dien tied oa ze soldoaten nodig en die wier dan eronseld bie 't schieten, naeda ze êest een berreg drank evoerd waere. De gewoonten van vroeger bin zo vee mogeluk vast ehouwe. Zo moge d'r nog oaltied allêen mè mannen uut Wasschappel an meedoe. Een Wasschappelaer is iemend dien a t'r noe weunt of dien a t'r geboren is. Di oardt eschote mee loaie kogels, die a ze zelluf smelte. As gooi gebruke ze troenken. 't Is een mooie gewoonte dat 'r tegen die troenken scheepjes en afbeeldiengen van biezondere gebeurtenissen uut 't ofeloape jaer espiekerd oare. Ienkele jaeren elee mode d'r mè een maximum aantal persoanen meedoe, mè inmiddels mag iederendêen meedoe dien a wil en an de voorwaerden voldoet natuurluk. De belangriekste gebeutenissen bin ieronder op een rijtje ezet. Op zondagaeven oardt de rolle opemaekt. De persoanen die mee wille doe moete dat dus op dien aeven melde en d'r naeme oardt dan op de rolle eschreve. Di kê je an zie da 't uut middeleeuwen stamt.

Op zaterdagochen gae d'n tamboer (iemend mee een trommel) bie 't opkommen van de zunne deur 't durp om oale gooischiêters uut bêdde te trommelen. Zodra a ze oal op de baene onder an d'n diek stae, begunne ze te schieten op de burgemêestertroenke. Dien a dat 'r ofschiet krieg de burgemêesterpries. Iederêen dien a t'r een troenke ofschiet krieg een lintje, di a ze dan d'n êelen dag grôos mee rondloôpe.

Rond een uur of negene gae ze mee z'n oalen een oen ge'nete in êen van de plaetseluke resterants.

Tegen de middeg gae ze ni 't Kasteel van Batavie, di a 't grôotse gedêelte van de Wasschappelaers is verzaemeld. Dat is een mooi moment om ouwerwesse te zienge. De slokjesjoen zurgt 'r vô da ze oal genoeg te drienken kriege. Tussen de middeg moge oale gooischiêters ni ruus om te gen'eten. Om êen uure moete ze dan wi present wizze. Zo nie dan kriege ze een boete van de Kaptein.

's Zaeterdagsmiddegs schiete ze net zô lange deur toetda oale troenken d'r of bin. De leste jaeren valt dat nie mee, omda ze nie mi mee zo vee kruut moge schiête. A de leste troenke d'r of is, voege de mêeste gooischiêters d'r eige onder de fêestende Wasschappelaers in de café's. Sommigste gooischieters soenkele a een bitje nae zô'n dagje schieten.

Op zondagmiddeg is 't priesuutriekienge. 't Is dan gebrukeluk dat de bitter de ronde doet. In elk geval is 't dusdaenig sfeer ver'ôgend da de middeg êel lank duurt.

Op de maendagaeven is 't de bedoelienge da de burgemêester bedankt oardt, en dat de vlagge, dien op de mart angt, ni beneé oar egaele. Di nest gae ze dan oak me z'n oalen in de kerremèsattracties en ni de café's. As lesten komme ze in 't Kasteel van Batavia. Dan oardt 'r nog een stuitje lekker ouwerwesse ezoenge.

Dit stikje is eschreve deur iemend dien a nog nooit ei mee edae an de gooischiêters en dirom oopt dat 't anevuld za oare deur een ervaeriengsdeskundige.